မြင့်မောင်
ဗုဒ္ဓဟူးနေ့၊ ဒီဇင်ဘာလ 03 2008
နယူးဒေလီ။ ။ မလေးရှားတွင် တရားဝင် လုပ်ကိုင်နေသော မြန်မာနိုင်ငံသားများ အပါအ၀င် နိုင်ငံခြားသား အလုပ်သမားများအား အလုပ်ရုံများမှ ယခုတလော လျှော့ချလာနေသည်။
တရုတ်၊ အိန္ဒိယနှင့် မြန်မာအလုပ်သမားများကို အကြောင်းတစုံတရာ မပြသလို၊ လျော်ကြေးမပေးဘဲ အလုပ်မှ ရပ်နားပစ်ခြင်းဖြစ်ကြောင်း မလေးရှားအခြေစိုက် မြန်မာအလုပ်သမားများ ကူညီစောင့်ရှောက်ရေး ကော်မတီနှင့် မြန်မာလုပ်သားများက ပြောဆိုကြသည်။
"အပ်ချုပ်လုပ်ငန်း၊ အထည်ချုပ် စက်ရုံတွေရယ်၊ စပယ်ရာပတ် လုပ်ငန်းတွေမှာ သိသိသာသာ ထိတယ်။ ရာဘာလက်အိတ် လုပ်ငန်းတွေက လူတွေကို ပြန်ပို့တယ်။ အော်ကြီးဟစ်ကျယ် ပြန်ပို့တာမျိုး မဟုတ်ဘူး။ ခိုးကြောင်ခိုးဝှက် လုပ်တယ်။ ပြန်ပို့ခံရမယ့် သူတွေတောင် မသိဘူး။ လျော်ကြေးဆိုတာ ဝေးလာဝေး" ဟု ကော်မတီ အတွင်းရေးမှူး ကိုရဲမင်းထွန်းက မဇ္ဈိမကို ပြောသည်။
မလေးရှားနိုင်ငံ ကလန်မြို့ရှိ Press Metal Berhad အလူမီနီယံ စက်ရုံမှ အလုပ်သမား ၁၀၀ ကျော်၊ Kejang ကီဂျန်းမြို့ရှိ ရော်ဘာလက်အိတ် စက်ရုံမှ ၆၀ ခန့်နှင့် ဂျိုဟိုးမြို့ရှိ အထည်ချုပ်စက်ရုံများမှ အမျိုးသမီးများ အပါအ၀င် လူဦးရေ ၇၀ ခန့်နှင့် ပီနန်မြို့ရှိ စက်ရုံအလုပ်ရုံအချို့မှ အလုပ်သမားများ အလုပ်ဖြုတ်ပြီးနောက် မကြာခင်က မြန်မာပြည်သို့ ပြန်ပို့ခဲ့သည်ဟု သူက ဆိုသည်။
ကီဂျန်းမှ ရာဘာ လက်အိတ်လုပ်ငန်းတွင် လုပ်အားခလျှော့ချလိုက်သဖြင့် ဆက်လက် လုပ်ကိုင်လိုခြင်း မရှိလျှင် အလုပ်ထွက်နိုင်ကြောင်း လုပ်ငန်းရှင်က ပြောဆိုသည်ဟု မြန်မာလုပ်သား ကိုစိုးက ဆိုသည်။
သူက "လုပ်အားခတွေ လျှော့ချလိုက်တယ်။ အလုပ်ရှင်ပြောတာက ငါတို့မှာ အလုပ်က မရှိသလောက် ဖြစ်နေတယ်။ မင်းတို့ကို စာချုပ်အရ ထားပေးရမယ်။ လစာ လုပ်အားခကို တ၀က်ပေးနိုင်တယ်။ မလုပ်နိုင်ရင် လက်မှတ်ထိုးပြီး ပြန်ရမယ်လို့ အကျပ်ကိုင်ပြီး ပြောလာတယ်။ အဲဒီလိုပြောလို့ တချို့က ကြိတ်မှိတ်ပြီး လုပ်နေတာတွေရှိတယ်။ ကျနော်ကတော့ မလုပ်နိုင်တော့လို့ ထွက်လိုက်တယ်" ဟု ပြောသည်။
အလုပ်ရုံတွင် တနေ့ လုပ်အားခ မလေးရှား ၁၈ ရင်းဂစ်သာရှိပြီး၊ ယခင်က အချိန်ပိုကြေးနှင့်ဆိုလျှင် တလတွင် ၅၀၀ ရင်းဂစ်ခန့် ရခဲ့သော်လည်း ယခုအခါ အချိန်ပိုကြေး မရတော့ကြောင်းနှင့် မြန်မာလုပ်သား ၇၀ နီးပါး ရှိခဲ့သော်လည်း ပြီးခဲ့သည့် လနှောင်းပိုင်းတွင် ၉ ဦး အလုပ်ပြုတ်သွားကြောင်း သူက ဆိုသည်။
အလုပ်သမားကော်မတီမှ ကိုရဲမင်းထွန်းက "ကျနော်တို့ သိတာက မြန်မာအလုပ်သမား ၃၀၀ လောက် အရင်လ လကုန်ပိုင်းမှ ပြန်ပို့ပြီးပြီ။ ကျနော်တို့ မသိသေးတဲ့ နေရာတွေလည်း ရှိတယ်" ဟု ပြောသည်။
ဂျိုဟိုးမြို့ရှိ တွင်ခုံလုပ်ငန်းတခုမှ အခြေအနေကို လက်ရှိ လုပ်ကိုင်နေသူ ကိုအောင်က ယခုလို ပြောသည်။
သူက "အခုတလော အလုပ်တွေက ပါးတယ်။ စက်ရုံမှာ အလုပ်မရှိဘူးဆိုရင် စက်ရုံကို သန့်ရှင်းရေး လုပ်ရတယ်။ ကျနော့် သူငယ်ချင်းတွေဆိုရင် အထည်ချုပ်စက်ရုံမှာ အလုပ်လုပ်တယ်။ သူတို့ဆိုရင် အထည်တွေ ချုပ်စရာမရှိရင် သူဋ္ဌေးအိမ်မှာ ဆေးသုတ်ပေးရတာမျိုး လုပ်ရတယ်" ဟု သူက ပြောဆိုသည်။
တရားဝင် အလုပ်လုပ်ကိုင်နေသည့် မြန်မာများသည် မလေးရှား လူဝင်မှုကြီးကြပ်ရေးဌာနမှ ထုတ်ပြန်သည့် စာရင်းအရ ၁ သိန်း ၈ သောင်းရှိသည်ဟု ဖော်ပြထားသည်။
Subscribe to:
Post Comments (Atom)
No comments:
Post a Comment