မြင့်မောင်
ဗုဒ္ဓဟူးနေ့၊ ဧပြီလ 08 2009
နယူးဒေလီ (မဇ္ဈိမ)။ ။ ဂျပန်နိုင်ငံရှိ မြန်မာတေးဂီတ ဝါသနာရှင်များဖြင့် ဖွဲ့စည်းထားသည့် မင်္ဂလာဒိုးအဖွဲ့က ရဲရဲတောက် တိုက်ပွဲဝင် မြန်မာ့ရိုးရာ သင်္ကြန်သံချပ်များ ဖြန့်ချိနေပြီဖြစ်သည်။
သံချပ်ကို ဂျပန်ရောက် မြန်မာ့ဒီမိုကရေစီ အင်အားစုများနှင့် ပြည်တွင်းမှ သံချပ် ဝါသနာရှင်များက ဝိုင်းဝန်းသီဆို အားဖြည့်ထားကာ၊ အင်တာနက်စာမျက်နှာ (http://mingalardoe.homeip.net/) ပေါ်တွင် ဖြန့်ချိလိုက်ခြင်း ဖြစ်သည်။
“တော်တော်များများ ဂျပန်မှာပဲ လုပ်တယ်။ မပေါက်ဘူးပေါ့ဗျာ။ တော်တော်များများက ပြည်တွင်း အကြောင်းကို လုပ်တယ်။ ကျန်တာက ဒီမှာဖြစ်နေတဲ့ နိုင်ငံရေး ဖောက်ပြန်မှုတွေ၊ မြန်မာနိုင်ငံသားတွေရဲ့ အခက်အခဲလေးတွေကို ကဏ္ဍလေးတွေ၊ ဟာသလေးတွေ ထည့်ထားပါတယ်” ဟု မင်္ဂလာဒိုးအဖွဲ့ကို စတင်တည်ထောင်ခဲ့သူ ဦးဝင်းရွှေက မဇ္စျိမကို ပြောသည်။
ယခုနှစ် သံချပ်ထဲတွင် 'သင်္ကြန်ကျပြီ' ၊ 'အင်တာဗျူး အစီအစဉ်' ၊ 'နအဖရဲ့ မျက်လှည့်' ၊ 'နအဖ ခေတ်မှာ ဒီလိုပဲ' ၊ 'တလုံး နှစ်လုံး စာသင်တုံး' ၊ 'ဂမ်ဘာရီလာရင် ပြန်ခိုင်းမယ်' ၊ 'မောင်ရေခဲ' ၊ 'ဒို့ မြန်မာများ စတိုင်ကျတယ်' ၊ 'သောင်းပြောင်းထွေလာ ဒီဂျပန်မှာ' ၊ 'ဒါ ဒို့တိုင်း ဒို့ပြေ' စသည့် သံချပ်အပုဒ်ရေ ၁ဝ ပုဒ် ပါရှိသည်။
ယခုနှစ် နေပြည်တော်၌ ကျင်းပသည့် ရုပ်ရှင် အကယ်ဒမီဆုပေးပွဲတွင် မင်းသမီးများ အကယ်ဒမီဆု မပေးအပ်ခြင်းနှင့် ပတ်သက်ပြီး သရော်ထားသည်လည်း သံချပ်ထဲတွင် သီကုံးစပ်ဆိုထားသည်။
ထိုထဲတွင် “အကယ်ဒမီပွဲ အကယ်ဒမီပွဲ၊ အကြီးကျယ်လုပ်တဲ့ အကယ်ဒမီပွဲ” ၊ “အကယ်ဒမီဆုများ ပေးလိုက်သလေ၊ မင်းသမီးများ မပါပေ” ၊ “မပေးချင်လို့မှ မဟုတ်ဘဲ၊ ယတြာနဲ့ နွှဲ” ဟု ဆိုထားသည်။
၁၉၉၁ ခုနှစ်တွင် မြန်မာ့ရိုးရာ ဂီတဝါသနာရှင် ၆ ဦးနှင့် စတင်ဖွဲ့စည်းခဲ့သည့် မင်္ဂလာဒိုးအဖွဲ့က နှစ်စဉ် မြန်မာသင်္ကြန် ပွဲတော်အခါ ရောက်တိုင်း သင်္ကြန်သံချပ် တေးသီချင်းများ စပ်ဆိုကာ ဂျပန်နိုင်ငံတွင် ပြုလုပ်သည့် သင်္ကြန်ပွဲတော်များတွင် သံချပ်ထိုးလေ့ရှိသည်။
အင်တာနက်ပေါ်သို့ ၂ဝဝ၇ ခုနှစ်မှ စတင်ကာ ဖြန့်ချိလာခြင်းဖြစ်သည်။
ဦးဝင်းရွှေက “ဟိုတုန်းက ဂျပန်မှပဲ လုပ်တယ်။ အဖွဲ့ဝင်တွေကနေ တကမ္ဘာလုံး သိသင့်တယ် ဆိုပြီးတော့ ပြောလာကြတယ်။ ကျနော်တို့ ကိုယ်တိုင်ကလည်း နည်းပညာပိုင်းဆိုင်ရာတွေ မကျွမ်းကျင်တာတွေလည်း ပါတယ်” ဟု ပြောသည်။
မင်္ဂလာဒိုးသည် မြန်မာနိုင်ငံမှ ပြည်ပခရီးစဉ် ဖျော်ဖြေပွဲများအတွက် ပြည်ပရောက်ရှိနေသည့် သီးလေးသီး ဆေးရောင်စုံ အငြိမ့်နှင့်အတူ စင်္ကာပူ၊ မလေးရှား၊ ကိုရီးယားနိုင်ငံတွင် ရောက်နေသည့် မြန်မာများကို သွားရောက်ဖျော်ဖြေခဲ့သေးသည်။
Subscribe to:
Post Comments (Atom)
No comments:
Post a Comment