မြင့်မောင်
သောကြာနေ့၊ မတ်လ 27 2009
နယူးဒေလီ (မဇ္ဈိမ)။ ။ ပဲခူးမြို့ ရွှေအပ်ထုပ် ဘုရားရင်ပြင်ပေါ်ရှိ ဘုရားဂေါပကအဖွဲ့ပိုင် ဆိုင်တန်းမှ ဆိုင်ခန်း ၇ ခန်းကို ကျခတ်ဝိုင်း ဆရာတော်၏ မိန့်ကြားချက်အရ ယမန်နေ့မှ စတင်ကာ အတင်းအကျပ် ဖျက်နေကြောင်း ဒေသခံများ အဆိုအရ သိရသည်။
နန်းတော်ရာရပ်ကွက် ရှင်စောပုလမ်းရှိ ရွှေအပ်ထုပ်ဘုရား ရင်ပြင်တော်ပေါ်သို့ မိုးပျံလှေကား တပ်ဆင်ရန် နေရာမလွတ်ဟုဆိုကာ ကျခတ်ဝိုင်း ဆရာတော် ဦးဇောတိပါလက ဦးဆောင်ဖျက်ဆီးနေခြင်း ဖြစ်သည်။
“ဘုရားဂေါပက ပိုင်တဲ့ ဆိုင်ခန်း ၇ ခန်း ရှိတယ်။ မိုးပျံလှေကားလုပ်တဲ့ အခါကျတော့ ဆိုင် ၇ ခန်းက ကွယ်တယ် ဆိုပြီးတော့ ကျခတ်ဝိုင်း ဆရာတော်က ဖျက်ခိုင်းတယ်။ ဂေါပကတွေ ညှိပြီးတော့ အစွန်ဆုံး နှစ်ခန်းကို ဖျက်ပြီးတော့ ကျန်တဲ့ ၅ ခန်းကို ၄ ပေစီလောက် နှိမ့်ပေးလိုက်တယ်။ အဲဒါကို ဆရာတော်က မကျေနပ်ဘူး။ ကျနော်တို့ကို ဖျက်ခိုင်းတယ်။ မြို့နယ်က ညွှန်ကြားချက်နဲ့ ဖျက်ရမယ်လို့ ပြောတယ်” ဟု ရွှေအပ်ထုပ် ဂေါပက ဥက္ကဋ္ဌက မဇ္ဈိမကို ပြောသည်။
ယခုအခါ ကျန်ရှိသည့် ဆိုင်ခန်း ၅ ခန်းအနက် ဆရာတော်က ဦးဆောင်ကာ ဖျက်ဆီးနေရာ ၂ ခန်းသာ ကျန်ရှိတော့သည်။
ဂေါပက ဥက္ကဋ္ဌက “ဆိုင်ခန်းရှင်တွေ လာရင်လည်း ဆိုင်ခန်းရှင်တွေကို ဆဲဆိုတယ်။ ငါ ကိုင်တုတ်တယ်။ ငါ အသက် ၈၉ နှစ်ရှိပြီ၊ အခုချိန်ထိ လူသတ်ရဲတယ်။ မင်းတို့ လက်မှတ်ထိုးဆိုပြီး အတင်းအဓမ္မ လက်မှတ်ထိုးခိုင်းတယ်” ဟု ဆက်ပြောသည်။
အဖျက်ခံရသည့် ဆိုင်ခန်းများမှာ ဒန်အိုးဒန်ခွက်အဟောင်းများနှင့် ပလပ်စတစ် အရောင်းဆိုင် ၂ ဆိုင်၊ ကားတာယာ အဟောင်းဆိုင်၊ တီဗီ-ကက်ဆက် ပြင်ဆိုင်၊ ကားမှန်လိုင်နာ ပြင်ဆိုင် ၂ ခန်းနှင့် ဘုရား ပြုပြင်ရန်အတွက် ပစ္စည်းပစ္စယများ ထားရှိသည့် ဂိုဒေါင်ဖြစ်သည်။
အဖျက်ခံရသည့် ကားမှန်လိုင်နာ ဆိုင်ရှင်က “ကျနော် အရမ်းကို ဒုက္ခရောက်နေပါတယ်။ ညက ၃ ခန်းဖျက်တယ်။ ကျခတ်ဝိုင်း ဆရာတော်ရဲ့ တပည့်ဖြစ်တဲ့ ကိုဝင်းအောင်နဲ့ ကိုဖုန်းနိုင်တို့က ဖျက်တာဗျာ။ ကျနော့်ဆိုင်ခန်းထဲမှာ ကားမှန်တွေရော၊ ကားပစ္စည်းတွေ အများကြီး ရှိသေးတယ်။ ကျနော့်ဆိုင်ကတော့ ဖျက်မယ့်ထဲ ပါပေမယ့် အဖျက်မခံသေးဘူး” ပြောသည်။
သူက ဆက်ပြီး “ဆိုင်ခန်းထဲမှာ ပစ္စည်းတန်ဖိုး ၁၅ သိန်းလောက် ရှိတယ်။ ကျနော့်ပစ္စည်းတွေ ကွဲခဲ့ရင် လျော်ကြေးပေးရမယ်လို့ ကိုဝင်းအောင်နဲ့ ကိုဖုန်းနိုင်ကို ညက သွားပြောထားတယ်။ ဒီနှစ်ခန်းက ဘာ့လို့ အခုချိန်ထိ မဖျက်သေးတာလဲ ပြောပြီး ဆဲဆိုသွားတယ်” ဟု ပြောသည်။
ဖျက်ဆီးပြီး ဆိုင်ခန်းများတွင် ထားရှိသည့် ပစ္စည်းအချို့ကို ဆရာတော်နှင့် တပည့်များက ယူသွားကြောင်းနှင့် ဆရာတော်ကြီးသည် အာဏာပိုင် အကြီးအကဲများနှင့် ရင်းနှီးသည့် ဆက်ဆံရေး ရှိသည့်အတွက် ဒေသဆိုင်ရာ အာဏာပိုင် အဖွဲ့အစည်းများထံ တိုင်ကြားရန်မှာ အခက်အခဲရှိကြောင်း ဒေသခံများကလည်း ပြောဆိုကြသည်။
Subscribe to:
Post Comments (Atom)
No comments:
Post a Comment